كود احمد الطيب وعادل المكناسي الرباط ////

فاجتماع الفيدرالية المغربية للاعلام يوم 11 فبراير اللي عاود انتاخب كمال لحلو رئيسا كاين اسم نائب الرئيس الثاني. اسمه محمد أيت بوسلهام. صفته كيف تنشرات “مدير وكالة اتصال”. اش كيدير واحد ظاهريا ها غير ظاهريا٬ مديرا وكالة. اش كيدير مدير وكالة ففيدرالية للاعلام؟. هادا السؤال غادي يتوضح باش تعرفو شكون هو.

هاد السيد كان فالاول كيتعاون مع الصحف الاماراتية المتخلفة. كان كيجيب بنات وولاد المعهد يكتبو وهو يوقع المقالات. عندنا شهادات من طالبات ف”ليزيگ” فالرباط عاناو. ماشي مهم هاد الموضوع دابا. اش ولى كيدير من بعد. ولى هو المكلف بالاتصال بسفارة الامارات العربية المتحدة بالمغرب. دابا شفتو الامارات كيفاش كدخل فشبوقاتنا. يعني مكلف بالاتصال مع الصحافيين المغاربة. كيسوق صورة هاديك الدولة.

هاد السيد مع الشافات ديالو فابوظبي هو اللي دار دير الرحلة الشهيرة ديال الصحافيين المغاربة مؤخرا. الرحلة اللي كان بنكيران قال فندوة صحافية على ثروتو٬ باللي مسؤول اماراتي حقق مع صحافي مغربي معروف على قبال تدوينة دارها على بنكيران. وفق احد الحاضرين لهاد التسافيرة اللي كان فيها هاد ايت بوسلهام٬ فان عدد من مدراء الصحف مشاو. مصدر “كود” قال ان باطرون واحد دارو ليه تهلية خاصة. فهاد التسافيرة كان فيها تركيز على الاخوان المسلمين وكيفاش يتم مواجهتهم. كيقصدو العدالة والتنمية.

هادي فضيحة كبيرة خاصة ان فهاد الصحافيين كاين فيهم اللي رفض على العرض٬ ولكن الاخطر ان هاد الدولة اللي كتسوق صديقة شقيقة كدخل فالحياة السياسية المغربية. رئيس الدولة الملك محمد السادس معين رئيس حكومة اسلامي صوت عليه المغاربة. اي كاين توافق الفوق والتحت وكلشي قابل اللعبة. مال الامارات. خاص نديرو ليهم ما دار حسن الفد فواحد باروديا على فيصل القاسم. وفهاد الحالة هي دولة الامارات وباقي الخليجيين. الحوار اللي دار صالح لليوم: وتوما سيرو عطيونا التيساع. وقلبو على المغرب. واسيدي ما غادينش نكونو بحالكم =عرب= وغاديين نكونو گور گاع.

دابا الدولة المغربية وفق اكثر من مصدر ل”كود” فخبارها هاد التدخل الخطير فشؤون المغرب الداخلية. يمكن من اسباب استدعاء سفيرها فالامارات هاد النقطة ماشي غير برنامج فقناة “العربية” على البوليساريو. قناة كتبث من الامارات.

ولكن هاد الشي ماشي كافي. خاص تحرك اخطر. ما يسمحوش لهادوك المتخلفين لا قطر لا الامارات لا السعودية تتدخل فشؤوننا الداخلية. كلهم ماشي قدوة. خاص فضح كاع اللي كيستافد من هادو. سواء شي وحدين محسوبين على الاسلاميين وتعاونهم مع قطر سواء هادو اللي كيخدمو مع الاماراتيين سواء المتطرفين الوهابيين المتخلفين اللي كيخادو من السعودية.