كود سعيد الشاوي كازا ///

علمت “كود” ان هادوك اللي تسببو فترياب عمارة فكازا هاد السيمانا طلبو رخصة للاصلاح كثر من شهر ونص ووفق مصادر “كود” فالطلب اللي فيه غير اصلاح ترفض لان اللي حطو ما جابش اذن من مول المحل.

الاصلاح كان غادي يدار للطابق الارضي باش يديررو ريسطو وقهوة. فديك المنطقة كاينة اقبال على هاد الشي حقاش قريبة من مسجد الحسن الثاني بزاف وكاين اقبال كبير للسياح من داخل المغرب وخارجو.

اللي كاري هاد المحل اذن هو اللي قدم طلب الاصلاح بلا خبار مالين الملك اللي كاينين فمراكش.

المفاجأة الاخرى والخطيرة. باش هادو اللي كراو ما حصلوش على رخصة الاصلاح٬ ناضو بداو الاصلاحات. طبعا تواطئات معاهم السلطات. يستحيل فديك المنطقة اللي ما بعيداش على عمالة انفا باكثر من 100 مترو يخدمو بلا خبار المخزن.

اكثر من هاد الشي وكيف سبق ل”كود” كشفات عليه٬ كانت شكايات من سكان العمارة للقايد وللمقدم على هاد الاشغال ولكن غير بالتلفون. ما مشاوش حطو شكاية مكتوبة. المهم ما داهاش فيهم المخزن وبقاو مالين القهوة اللي كانو كوايرية خدامين.

باش تأكدو باللي العمارة غادية تريب٬ تضيف مصادر “كود” مشاو عاودو طلبو رخصة اخرى نهار لاربعا 22 ماي مع الجوج اي 24 ساعة قبل ما تريب. العمارة طاحت يوم الخميس 23 ماي اللي فات.

دابا للي وقع راه فيه كاع اركان الجريمة. لحد الان مازال ما طاح حتى راس.

القضاء فتح تحقيق والبحث مستامر وخاص كلشي يخلص.

كانت “كود” نشرات خبار وضع 3 فهاد الملف تحت الحراسة النظرية وهادو غيستامرو معاهم فالتحقيق٬ وفق اخر الاخبار٬ فحالة سراح.