كود الرباط//

فأول تعليق لها على الصورة لي تسربات ليها فالصحافة البريطانية والاسترالية، قال ليلى بنعلى وزيرة الانتقال الطاقي والتنمية المستدامة، بلي كاين استهدافات كثيرة لها من العام لي فات.

الوزيرة لي مبغاتش تعطي تفاصيل اضافية، وبغات توضح حقيقة الصورة، فاش سولناها فـ”كود” واش الصورة لي تسربت صحيحة، الوزيرة قالت “لا لا غادي نهضر…”.

يشار بلي تصويرة ديال رئيس شركة فورتيكيو، أندرو فورست، وهو كيبوس امرأة (يقال بلي هي الوزير بنعلي حسب الصحافة الاسترالية) في باريس تنشرات في صحيفة “ديلي ميل” ف عطلة نهاية الأسبوع، أثارت الكثير من التكهنات حول هوية المرأة الغامضة.
‎

وحسب جريدة The Australian، المرأة المعنية تقدر تكون وزيرة الطاقة المغربية ليلى بنعلي، اللي، وفقا للجريدة ديما كتلقى راسها فمحيط فورست بطريقة عجيبة – سواء كان هادشي أثناء استقبالها الرسمي لفورست ووفد فورتيكيو في العاصمة المغربية الرباط ففبراير، أو لقاءه فدافوس قبل شهر.
‎

وكانت بنعلي في باريس هادي شي سيمانة فمهمة وزارية، وهو نفس الوقت تقريبا اللي تم فيه التقاط صورة فورست وهو كيبوسها فالدائرة الرابعة.
‎

ووفقا لمنشورات بنعلي على وسائل التواصل الاجتماعي، كانت فباريس لتعزيز العلاقات الفرنسية في مجال الانتقال الطاقي، وهو مجال كيبغيه فورست.

‎ومن المثير للاهتمام أن أنشطة شركة فورتيكيو فالمغرب قد ازدادت منذ اجتماع فورست مع بنعلي فالرباط، حيث أعلنت الشركة عن مشروع مشترك مع مجموعة OCP فأبريل لتزويد الهيدروجين الأخضر والأمونيا والأسمدة، محليا ولأوروبا.
‎

واش هاد المناقشات هي اللي شعلات الشرارة؟ شكون عرف، ولكن بالتأكيد أن الصورة المحرجة لفورست وهو كيبوس بنعلي غاتسرع الحديث عن طلاق فعلي من مراتو نيكولا فورست؛ حيت هما مفارقين ولكن مازالين متزوجين قانونيا.
‎

وبطبيعة الحال، الجريدة الاسترالية اتصلات بفريق فورست الإعلامي، ورفضت المتحدثة باسمهم التعليق تماما.