كود الرباط ///

قبل فترة قدمات مسؤولة بوزارة الخارجية الامريكية محاضرة فكلية الحكامة والعلوم الاقتصادية والاجتماعية بجامعة محمد السادس متعددة الاختصاصات بسلا. هدرات على التعايش بين الاديان وكان من الطلبة الحاضرين ولي العهد مولاي الحسن اللي كيقرا تماك.

المسؤولة الامريكية وفق مصادر “كود” باش سالات المحاضرة هدرات شي ربع ساعة او كثر على انفراد مع ولي العهد. ووفق ما نقلته المسؤولة الامريكية٬ تضيف مصادر “كود”٬ فالانطباع اللي خرجات بيه فيه اعجاب بالطالب الامير. قالت٬ تضيف مصادر “كود” باللي باش كيهدر كلامو مرتب وباللي تفكيرو مقاد.

طبعا المسؤولة الامريكية ما جاتش غير دير محاضرة عن التعايش الديني٬ راها تابعة للخارجية الامريكية ولقاء ولي العهد بشكل مباشر مهم ليهم. يعرفو كيف كيفكر كيف كيهدر كيف كيتعامل.

20 او 15 دقيقة مع شخصية بحال الامير تعطيهم معطيات مهمة على شخصيتو خاصة ان الامير قليل الظهور. باش كيبان كيكون مع والده الملك محمد السادس.

اساتذة ديالو كانو هدرو فعدد سابق ف”تيل كيل” على ذكاء ولي العهد والتزامو بالقراية وبواجباتها وجبدو الذكاء اللي كيتميز بيها. هاد الشي اللي كرراتو المسؤولة الاميركية