كود – طنجة//

رسات البارح الأحد فميناء طنجة السفينة السياحية «سيليبريتي إكوينوكس»، اللي كدير رحلة سياحية مخصصة لمجتمع المثليين والمثليات، فإطار أول توقف ليها فالسواحل المغربية.

السفينة وصلات مع السبعة ديال الصباح، ومشات  مع الرابعة ديال العشية، بعدما بقات نهار كامل فالميناء ،مئات المسافرين هبطو للمدينة ودارو فالأحياء القديمة، والقصبة والساحة الكبرى، كما زارو الأسواق التقليدية وكلاو فعدد من المطاعم  المحلية.

وحسب مصادر ، داز كلشي بخير وعلى خير ومتعرض حد لماضيقات،وخا مكانتش حتى أي استقبال رسمي أو ترحيب خاص بالسفينة الشي لي قلق شوية السياح.

هاد التوقف كيدخل فإطار برنامج أول رحلة متوسطية لشركة VACAYA، اللي انطلقات من برشلونة نهار 6 غشت، ومن المرتقب تبقا حتى 15 غشت ،الرحلة كانت كتميز بأجواء احتفالية وحفلات موسيقية وعروض ترفيهية موجهة للمسافرين، إضافة لفعاليات خاصة، من بينها نهائيات مسابقة «مستر غاي أوروبا»، وحفل للفنانة بوني تايلر، ومتابعة ظاهرة الكسوف الكلي للشمش.