مصطفى الشاذلي كود تنزانيا ////
نهار 22 ماي 2025 وصلات طيارة دالخطوط الملكية المغربية لمطار جزيرة زنزبار فتانزانيا. باش يخرجو اللعابة من هاد المطار طلب منهم 3 سوايع والوفد اللي كان معاهم 5 سوايع. هاد الصباح علمت “كود” ان نهضة بركان تقدمات رسميا باحتجاج للكاف فاجتماع اللجنة التقنية اللي دار فالملعب اللي غادي يحتاضن غذا الاحد ماتش الفينال روتور بين نهضة بركان وسيمبا التنزاني من نهائي كأس الكونفدرالية الافريقية لكرة القدم. الذهاب بركان ربحاتو بجوج لزيرو.
لكن علاش زقع هاد التأخير وكيفاش بغاو التنزانيين يلعبو على نفسية اللعابة؟ كلشي ما كانش يوقع لو ان سفير المغرب فتنزانيا زكريا الكومري دار خدمتو.
نهضة بركان حسب مصادر “كود” نسقات مع السفارة. هاد الاخيرة فشخص السفير قال ليهم صافي غاديين تجيو وتاخذو الفيزا فابور. حقاش الفيزا كيدير 50 دولار وكتاخذها فالمطار. كثر من هاد الشي رسل ليهم فورميلير باش غير يوصلو يدوزو بالزربة.
باش وصلو، حسب مصادر “كود” اولا ما لقاوش السفير، بل الرجل الثاني. لاعب فينال وما جاش سعادتو. لكن ماشي هي هادي المفاجأة، لقاو راسهم خاصهم يخلصو الفيزا. حتى هادي ماشي مشكل ولكن خاصهم يخلصو اولا التأمين ومن بعد يعمرو فوريمير ديالو فتلفوناتهم بعد ما يخلصو 44 دولار ويهبطو يدوزو عند مكتب اخر فيه فورميلير ثاني. يعطيوه الباسبور ويشوف التأمين عاد يدوزو لمكتب ثالث يخلصو 50 دولار ويرجعو للمكتب عاد يدوزو عن البوليس. هاد العملية مع ثقل خدمة رجال المطار خدات للعابة بركان 3 سوايع وللي معاهم فالطيارة 5 سوايع كيف قلنا.
هاداك نائب القنصل قال ليهم ما عندي ما ندير، حسب مصادر “كود”. وعلاش جاي بالسلامة؟
السفير الكومري ما دارش خدمتو وكذب على الفرقة بوعود عارف ما يقدرش يوفي بيها. دابا حتى اليوم السبت 24 ماي عاد جا مع عائلتو للوطيل اللي مريح فيه النادي فالسونتر التاريخي لزنزبار.
سفير بحال هاكا ما يستحقش هاد المنصب. بحالو بحال رئيسو وزير الخارجية والتعاون ناصر بوريطة، فالتصاور هو اللول وفالخدمة كيغبر. ايلى صدقات ينسبها لراسو ولا فشلات ماشي هو مولاها.
