كود سبور//

دار الدولي المغربي سفيان ديوب لاعب نيس الفرنسي، عملية على رجليه بعدما دازت أشهر وهو كيعاني من إصابة كانت جاتو فأواخر شهر نونبر من عام 2023 فماتش للفريق ديالو.

وعلن سفيان ديوب على أنستغرام، أنه دار عملية جراحية اليوم الخميس على رجليه، وأكد أنه غيرتاح دابا من بعدما فتح، وبعد منها غيبدا يخدم فالبروگرام الطبي باش يرجع يلعب الكورة مع الفريق ديالو نيس.

ووضح سفيان ديوب أن قرار العملية الجراحية اللي دار جا من بعد الخضوع ديالو لتريتمون للعلاج من الإصابة اللي كانت جاتو قبل أشهر، ولكن ما فاتوش الحال داكشي علاش قرر هو والطاقم الطبي ديال نيس أنه يدير عملية جراحية.

وكان سفيان ديوب اللي من أم مغربية فضل يلعب للمنتخب الوطني المغربي وعيط له الناخب الوطني وليد الركراكي، وكان فلاليست ديال ليكيب ناسيونال استعدادا لكوب دافريك 2023 فالكوت ديفوار، ولكن الإصابة حرماتو من المشاركة فالكان مع المغرب، مع العلم أن اللاعب مول الـ22 عام فضل الأسود. على السنغال بلاد باباه وفرنسا فين تزاد وكبر.