كود – سبور //

فتصريحات قاصحة عطاها لإذاعة “FunX FM” الهولندية، قال محمد أمرابط، خو الدولي المغربي سفيان أمرابط، ان هاد الاخير كاعي من الاختيارات التكتيكية ديال المدرب وهبي ، وأكد باللي سفيان مقلق بزاف بسبب التهميش لّي تعرض ليه فهاد المونديال.

وحسب الهضرة ديال خوه، اللاعب سفيان أمرابط “طلع ليه الدم بزاف ” من قرارات محمد وهبي ومابقاش حامل الطريقة باش تعامل معاه، وزاد قال باللي خوه ماباغي يهضر مع حد دبا وكيعيش غضب حقيقي بسبب هاد التهميش.

أمرابط ما لعبش رسمي فهاد البطولة إلا فالماتش ضد هايتي، ومن بعد لقا راسو جالس فالاحتياط طول المونديال ، وفالماتش ضد فرنسا، ما دخلوش وهبي حتى للدقائق الأخيرة كبديل روطار ، الشّي لّي اعتبراتو عائلتو تقليل من القيمة ديالو كواحد من الركائز لّي صنعوا الملحمة ديال قطر.

من جيهة أخرى، الطاقم التقني بقيادة محمد وهبي دافع على هاد الاختيارات، المدريب كانت عنده رؤية ديالو بغا يدخل بيها دم جديد في خط الوسط الدفاعي، داكشي علاش حط التيقة كاملة فالدراري الصغار بحال أيوب بوعدي ونائل العيناوي. وخا هاد الجوج قدمو ماتشات زوينين وبانوا مزيان، ولكن غياب لعاب عندو خبرة بحال أمرابط فالماتش ضد فرنسا خلا بزاف د التساؤلات وعلامات الاستفهام تدور على هاد المغامرة بـ “الركايز” ديال الفرقة.