كود سبور//

دار الدولي المغربي سفيان أمرابط ماتش كبير مع مانشستر يونايتد أمام كريستال بالاس اليوم الثلاثاء، ضمن منافسات كأس رابطة المحترفين النكليزي، فأول ماتش غيلعبو تيتيلور.

الهولندي إريك تين هاك مدرب مانشستر يونايتد دخل  سفيان أمرابط أساسي ضد كريستال بالاس، ولعبو فالشوط الأول كظهير أيسر وفالشوط الثاني رجعو لوسط التيران والنجم المغربي قدم مستوى مزيان.

وحسب الإحصائيات فسفيان أمرابط دار ماتش مزيان، ومس الكرة 72 مرة، وربح الثنائيات اللي جاوه فالماتش كاملين والعدد ديالهم 4 وحقق فيهم 4/4، ووصلت نسبة دقة التمرير عندو إلى 92٪، وعطى 4 الباسات طوال من أصل 5، وجاب 2 كوفرات، وتيرا مرة وحدة.

وفتصريح له قال سفيان أمرابط بعد أول ماتش لعبو تيتيلور مع مانشستر يونايتد اللي ربحو فيه كريستال بالاس بنتيجة 3. لزيرو: “كان الحلم ديالي ملي كنت طفل صغير نلعب فمانشستر يونايتد”.

وبخصوص البوسط ديال الظهير الأيسر اللي لعب سفيان أمرابط فالشوط الأول مع المان يونايتد، قال سفيان أمرابط: “غنلعب فينما تحطيت وكنت قادر نعطي الإضافة للفريق، واخا نكون كول.. أنا كنلعب على قبل اللوكو د الفريق”.