الوالي الزاز -كود- العيون///
[email protected]

وجهات سفارة الصين فالدزاير إهانة كبيرة لنظام العسكر واخا ما كانتش الإهانة مقصودة، البارح الإثنين.

سفارة الصين فالجزائر بغات دير الخير فالموظفين الجزائريين ديالها بمناسبة عيد الفطر، وناضت عطاتهم كاضوات باش دخّل عليهم الفرحة، ولكن هادوك الكاضويات تحولوا لإستهزاء.

سباب هاد الإهانة لنظام العسكر والجزائريين كان هو نوعية الهدايا اللي قدموا للموظفين الجزائريين، بحيث عطاوهم مواد غذائية، بالإضافة لبيدو 5 لتر ديال الزيت وسط حالة من الفرحة فصفوف الموظفين، وزادت السفارة الصينية كفساتها بنشر هاد الهدايا على حسابهم فمنصة “إكس” والتعليق عليها.

تعليق سفارة الصين فالجزائر كان فيه بزاف ديال الحگرة والشوهة وبينات فيه أن الشعب الجزائري ما عندوش باش يعيش وكتبات فيه ” صح عيدكم ! قال السفير عند توزيع ضروريات الحياة لكل موظفي السفارة الجزائريين بمناسبة اقتراب عيد الفطر. لكل الجزائريين جميعا ان شاء الله”.

السفارة الصينية فالجزائر اضطرت انها تحذف المنشور دقائق بعد نشرو بسباب كمية السب والشتم اللي تلقاتو من طرف الجزائريين، وعلى الرغم من ذلك كملات فالحگرة والإهانة وما دارت حتى إعتذار، لأن ما نُشر هو حقيقة كيعيشها الشعب الجزائري، خقيقة الوضع الإقتصادي والأزمة اللي كاينة عندهم فأساسيات الحياة.