كود ـ سطات//

عرف شارع الحسن الثاني بسطات، وبالضبط قدّام ضريح الولي الصالح “سيدي الغليمي،” مساء اليوم الثلاثاء 25 نونبر، حادثة سير خطيرة ماتت فيها مرا فـالخمسينات من العمر (من مواليد 1975) كتسكن فـحي البطوار، بعدما تعرضات لدهس من طرف سيارة خفيفة كان كيْسوقها طالب جامعي، قالت مصادر من المنطقة إنه كيقرى فالمدرسة الوطنية للتجارة والتسيير بسطات.

الضحية كانت كتحاول تقطع الطريق قبل ما تفاجئها السيارة وتصطدم بها بقوة، الشي اللي خلاها تموت فالبلاصة نتيجة الاصطدام القوي ليها مع اللي السيارة نتيجة السرعة.

وفور علمها بهاد الكسيدة، حضرات الوقاية المدنية لي قامت بتنظيف مكان الحادث، وكذلك عناصر مصلحة حوادث السير التابعة لولاية أمن سطات اللي دارت المعاينات الضرورية وفتحات تحقيق فظروف وملابسات الكسيدة، بإشراف النيابة العامة.

الجثمان ديال المرا تم نقله لمستودع الأموات فالمركز الاستشفائي الحسن الثاني بسطات، فانتظار ما ستسفر عنه الأبحاث لتحديد المسؤوليات وترتيب الآثار القانونية.