وكالات//

ماتت نجمة “تيك توك” البريطانية “نان نورما”، اللي سرقات قلوب الملايين بفيديوهاتها الطريفة والمؤثرة اللي كانت كتديرهم مع حفيدتها “جيس”، نهار الخميس 5 يونيو، وفعمرها 91 عام، وسط أجواء عائلية هادئة.

نورما ولات معروفة بزاف فالسوشيال ميديا فالأربع سنين اللي فاتت، من بعد ما ظهرت فمئات الفيديوهات مع حفيدتها، وولات رمز جميل للعلاقة القوية بين الأجيال.

@jessandnorma

فبيان مؤثر، اللي ترافق مع تصويرة لنورما وهي لابسة تاج كيبرق، عبّرت جيس على الحزن الكبير ديالها، وقالت: “خسرنا الصخرة ديالنا، وكل شي فحياتنا. نان مشات فالنوم بسلام وسط عائلتها، وكانت محاطة بالحب والحنان. إلى كانت شي وحدة تستاهل الجنة، فهي نتي يا نان نورما”.

وزادت جيس وقالت أن آخر السنوات فحياة جدتها كانت مميزة بزاف بفضل المحبين ديالها والتفاعل ديالهم، وقالت: “91 عام ماكانوش كافيين. عاشت حياة زوينة، وغيابها خلّى فراغ كبير ما يتعمرش”.

عدد كبير من لي فان ديال نورما تفاعلو مع خبر الوفاة برسائل تعزية ودعم مؤثرة، بزاف قالو إنها كانت بحال الجدة ديال الجميع، وشي ناس طلبو يتنظم ليها وداع يليق بالمكانة ديالها، وآخرين وصفوها بأنها “خلفات إرث زوين ديال الحب والدفء”.