كود – وكالات //

شركة كبيرة فصناعة الواقيات الذكرية، سميتها Karex، قالت باللي ممكن ترفع الثمن ديال المنتوجات ديالها بنسبة بين 20% و30% إلا بقات الحرب ديال إيران.

المدير ديال الشركة، Goh Miah Kiat، صرّح أن الوضع صعيب بزاف حيت كاين ارتفاع فالتكاليف ديال التصنيع والتغليف، و الروطار فالشارج وقال : “ما عندنا حتى اختيار، خاصنا نرفعو الثمن على الزبناء”.

المشكل جا بالخصوص من بعد سدان مضيق هرمز وهادشي أثر على المواد الأولية اللي كتستعمل فصناعة الواقيات، بحال النفط ومشتقاته و المطاط الصناعي، و مواد التغليف، وزيت السيليكون لي بظاف منها كيجي من الشرق الأوسط.

وزيد عليها أن كاين كاين طلب كبير ولكن السلعة ما وصلاتش فالوقت ،وكاين حتى تأثير على العمال  ولات فيها مشاكل فالتنقل بسبب غلاء المحروقات.

شركة Karex كتنتج كثر من 5 مليار بريزيرفاتيف فالعام، وكتفورني ماركات كبار بحال Durex وTrojan، وحتى خدمات صحية بحال NHS فبريطانيا، وبرامج ديال الأمم المتحدة.