كود كازا//

قررات لجنة أخلاقيات المهنة والقضايا التأديبية فالمجلس الوطني للصحافة، تسحب بطاقة الصحافة من مدير موقع “الجريدة إكسبريس” لمدة عام واحد، بعدما نشرو فيديو فيه دعوة صريحة للعنف والقتل، وزادو عليه صور وتصريحات لأطفال قاصرين بلا مراعاة للحماية القانونية ديالهم.

القرار جا بعد اجتماع اللجنة اليوم فمقر المجلس فالرباط، وهاد العقوبة دارت على خلفية بث الموقع المذكور لمقطع فيه شاب كيحرش على استعمال العنف فبعض الاحتجاجات اللي عرفاتها مدن مغربية، وهادشي اعتبراتو اللجنة مخالفة خطيرة لميثاق أخلاقيات المهنة.

اللجنة، من بعد ما سمعت لمدير النشر ودرسات الملف، خرجات بقرار واضح كيأكد أن الصحفي خاصو يتحمّل المسؤولية تجاه المجتمع، وما خاصوش يشجع على العنف أو الإرهاب، أو يستغل الأطفال ولا يصورهم بطرق تمس بكرامتهم.