كود الرباط//

كشف أمين التهراوي، وزير الصحة والحماية الاجتماعية، لأول مرة، عن كواليس المصائب اللي وقعات ف سبيطار الحسن بأكادير، بحيث كشف بلي المسؤولين على السبيطار خباو معطيات على الوزارة مركزيا ومعطاوش تقارير على شنو طار فالسبيطار.

وقال الوزير التهراوي، قبل قليل على قناة الثانية، بلي “اللي وقع ف مستشفى اكادير، كانت وفيات كثيرة ف وقت قصير ناتجة عن عدة اختلالات سواء من خلال البنيات التحتيات القديمة بحيث المستشفى قديم تعطات الانطلاقة سنة 1967 ومكانش اعادة التأهيل ديالو ومشاكبل ف التجهيزات كانت خاسرة ومكانتش صيانة ليها”.

وزير الصحة كشف هاد المعطيات الخطيرة، واللي خصها محاسبة صارمة، بحيث كاينين اجهزة خاسرة مخدامش لسنوات وكولشي متورط ناهيك عن غياب الصيانة، يعني المسؤولين على قسم الصفقات والصيانة خصهم الحساب اليوم، خصوصا مدير الصيانة والتجهيزات بالوزارة عبد الوهاب بلمداني.
وأشار الوزير للي دايز ف برنامج خاص ف دوزيم، إلى غيابات الموارد البشرية وعدم احترام السير العادي للمؤسسة الصحية، يعني مكاين غير سليت, وهادي مسؤولية الموارد البشرية.
أما مشكل الحكامة، فقال الوزير بلي :” لم نبلغ بالمشاكل ف وقتها، خديت قرارات وعطيت تعليمات باش تخرج مفتشية العامة للوزارة وتبحث. وخدينا تدابير تقارير استعجالية.”.

وأوضح الوزير بلي :”الوفيات الاولى كانت نصف غشت واخر الوفيات ف شتنبر. الخلل لم نتوصل بالمعطيات. قبل ما تكون المظاهرات ارسلنا فرق للميدان للتأكد من الوضع”.

المشكل ماشي غير ف اكادير وفق الوزير التهراوي، حتى مستشفى الفرابي ف وجدة، ومستشفى الداخلة، مهم لقا فضايح كثيرة. لا حكامة تدبيرية وصفقات مشبوهة وزيد عليها سليت الاطباء.

وأفاد الوزير بلي رسل تقرير المفتشية العامة لوزارة الصحة للنيابة العامة حول سبيطار الحسن الثاني باكادير، وتم توقيف عدد من المهنيين.