محمد سقراط-كود///

سبحان الله مستحيل تسمع شي هجرة جماعية لدولة إسلامية من أجل تحسين الوضع الاقتصادي، ديما البلدان الإسلامية هوما لي هارب منهم الواحد، السعودية لي مخنوقة فلوس وكتلقى سعوديين طالبين اللجوء في أوروبا وامريكا وكندا، حقا كاين هجرات جماعية عديدة نحو بلدان إسلامية ولكن كانت غير اظطرارا لعدم وجود خيارات أخرى، كاينة هجرة البورميين للسعودية وبالخصوص مكة وهوما لي بناو فيها دوك الاحياء العشوائية لي دايرة بمكة، بعض منهم كانوا بالوراق وبزاف بلا وراق وعمرهم يحلموا بيهم أو بالجنسية، بينما البلدان العلمانية بحال الصبليون خمس سنوات ومن حقك تدفع طلب الجنسية، يمكن تكون من أي بلاصة في العالم وتهاجر للدول العلمانية تدوز فيها شوية دالوقت يمكن تولي فرنسي واسباني وبريطاني وميريكاني، ولكن مستحيل تولي سعودي او قطري او مغربي أو كاع البلدان الإسلامية، بلا منهدرو على الكويت لي حيدات الجنسية لنص مواطنيها بما فيهم وزراء سابقين وسفراء خدامين ومشاهير وفنانين وكاع فئات المجتمع بدعوى ماشي كويتيين بالشكل الكافي.

كاينة هجرة الأفغان لإيران وباكستان بسباب الحروب، بزاف ديال الأفغان كانوا كيخدموا في البني في إيران وكيعيشوا مكرفصين، راه كاين شخصية عامل بناء أفغاني في ايران في فيلم طعم الكرز ديال عباس كيروستامي، ولحد الآن حتى أفغاني ماخدا الجنسية الإيرانية ورجع إيراني، ديما غادي يبقى مهاجر ودخيل وغريب إلى الأبد، شتي الوقت لي دوزو رضى الطالياني عايش في المغرب كون دوزو فشي دولة خرى في أوروبا كان ياخد الجنسية طاير، ونهار يدير كسيدة يقولوا عليه فرنسي من أصول جزائرية دار كسيدة سكران، ولكن حيت في المغرب هاهو خيخ هنا وعند أول كسيدة سماوه جزائري وبداو يقولوها ويعاودوها، بحال الى ممنحقوش يسوگ في المغرب أو يسكر فيه وهو عايش فيه سنوات هادي.

الخليج عامر بالمصريين ولكن مكاينش شي عامل مصري رجع إماراتي او سعودي أو قطري او كويتي، بينما أي مصري مشا لأوروبا او أمريكا وكندا راه دار الجنسية وولد ولاد بجنسية البلد المضيف من النهار اللول، ومع ذلك بزاف ديال المهاجرين عوض يندامجوا في بلدان المهجر العلمانية المتقدمة، كيحاولوا يردوها بحال البلدان منين جاو، كأنهم رسل للخراب والتهرگاويت والتشدد والتطرف، خلاها العسكري الصبليوني لي من أصول طنجاوية في سبتة فاش قال لخوتوا المغاربة،” بهدلتو بينا حتى الشانطي متعرفوش تقطعوه شخال دگزا على خلاها”، راه غير مسار الهجرة في العالم غادي يبين ليك شكون الغالط وشكون لي على حق، أغلب الهجرات هي من بلدان إسلامية أو إشتراكية أو افريقية لأسباب أخرى، بينما الدول الإسلامية واخا المرفحة فيهم بحال دول الخليج، واخا تهاجر ليها ألف عام غادي تبقى غريب وبراني وماتحلمش بالجنسية وغادي يجي واحد النهار وخاص ترجع بحالك، واش هادي حالة.