كود -عثمان الشرقي//

نهار السبت 22 غشت تلعب واحد الماتش ف”القسم الثاني” الإسباني، بين “جمعية سبتة الرياضية” وفريق لاس بالماس ، ولكن هاد الماتش ما بقاش غير كورة، وإنما رجعوه الصبليون مسرحية سياسية وحرب رياضية ضد للمغرب ولي رفعو فيه حتى شعار ”الفينال ديال كاس العالم 2030 مغيكونش فالمغرب ”

سلطات وأنصار سبتة حولو الماتش لاستعراض قومي إسباني، بالشعارات الإسبانية فتربيلات ضد للمغرب، واللاعبين حتى هما لبسو تونيات مكتوب فيهم: «سبتة ماشي للبيع، سبتة غادي ندافعو عليها» فمحاولة لتزوري التاريخ وطمس الهوية الحقيقية ديال الأرض.

https://twitter.com/i/status/2091211163522490430

ولكن لي كيخلي لعجب هو أن فريق لاس بالماس اللي جا يمارس المراهقة القومية لقى راسو مضطر يدوز من تطوان باش يدخل لسبتة ،أما  فالرجوع مزال ما عرفناش واش غادي تخليهم السلطات المغربية يرجعو منين جاو ولا غا يتمنعو ويقطعو البحر.

فمحاولة للتمويه، الصحافة الإسبانية كانت طلقات اشاعات كتقول بلي تلغات هاد المبادرة حيث لاس بالماس مباغا صداع مع المغرب ولكن فالحقيقة كانو باغيين غير يستغلو المطارات والطرقان والأمن المغربي باش يدوزو لسبتة قبل ما يعلنو على نيتهم فالاخير.

https://twitter.com/i/status/2091212067797602586

هاد التبرهيش ديال الإعلام والجمهور والكرة الإسبانية ما هو إلا دليل على الرعب والعقدة اللي عايشين فيها قدام المغرب اللي متشبت بسبتة ومليلية بلا ميلعب دور الضحية او يشحن الشعب ضد الجيران أو حتى يحرش الإعلام على إهانة وسب المؤسسات الإسبانية كيف ما كيدير الإعلام الفرانكاوي .

الماتش سالا فـ 90 دقيقة، واللافتات والرايات غا تجمعوا فالخناشي، والجمهور مشا فحالو ولكن مغربية سبتة ومليلية ممحتاجاش التراس حيث هادي قضية مرشومة فجينات كل مغربي ومغربية .