كود سبتة//

نهار اليوم الثلاثاء بدا بشكل خايب فسبتة، من بعد ما عثرات فرقة الغطاسين ديال الحرس المدني الإسباني (GEAS) على جثة ديال واحد المهاجر طافية حدا الشاطئ ديال “Fuente Caballos” وقرّيبة بزاف لليابسة، كيف ما نقلات جرائد محلية بسبتة المحتلة .

وحسب مصادر من الحرس المدني، هادي هي الجثة رقم 42 اللي كتلقا فمياه سبتة من بداية 2025، فواحد العام اللي بدا كيسجل أرقام كتفجع، وبان بأنه غادي يبقى من أكثر السنوات سوداوية فملف الهجرة سرية.

الضحايا أغلبهم شباب كيرميو راسهم للبحر فمحاولة للوصول للضفة الأخرى، ولكن بزاف ما كيوصلوش، وكيغرقو وسط مغامرة خطيرة ما فيها حتى ضمان.

من بعد ما انتاشلو الجثة، تنقلات لمعهد الطب الشرعي فسبتة باش يديرو الإجراءات القانونية ويحددو الظروف اللي مات فيها هاد الشخص.