كود سبور //

فاس كتوجد لماراطون روحي كبير غدا الأحد 12 أبريل، من بعدما كان تأجل فشهر فبراير بسبب الفيضانات والجو اللي ما كانش مناسب ،المنظمين فجمعية الدلاء الرياضي  أكدو بلي جميع الترتيبات وجدات، والحدث غادي يدوز فظروف مزيانة، ونفاو الأخبار اللي كانت كتهضر على الإلغاء ديالو.

هاد الماراطون غادي يعرف مشاركة عدائين من المغرب وبرا، وغادي يكون فيه كثر من فئة باش يعطي الفرصة كلشي ،خاد السباقات هي : ماراطون كامل، نص ماراطون، سباق 10 كيلومترات، وحتى سباقات خاصة بصغار ، الهدف هو تشجيع الرياضة وربطها بالهوية الثقافية والروحية ديال مدينة فاس، اللي معروفة بتاريخها العريق وأجوائها المميزة.

البرنامج ديال النهار غادي يبدا مع 7 دالصباح باستقبال المشاركين، ومن بعد غادي تنطلق السباقات على مراحل، الماراطون الكامل غادي يبدا مع 7:30، اما نصف الماراطون و10 كيلومترات مع 8:30. الوصول  متوقع يكون ما بين 9 و9:10 حسب نوع السباق.

البدية غادي تكون من قدام ثانوية ابن خلدون فزنقة المرينيين والوصول غادي يكون فباب بوجلود فين غا يكون توزيع الجوائز مع 10:30، والاختتام الرسمي مع نص النهار، بالنسبة للأثمنة ديال المشاركة كتبدا من 100 درهم للصغار حتى ل400 درهم للكبار حسب نوع السباق .