كود سبور//

هضر ريكاردو سا بينتو مدرب الرجاء الرياضي وشرح علاش عطى للحسين رحيمي يتيري ضربة الجزاء اللي ضيعها فالكلاسيكو ضد الجيش الملكي، اليوم الثلاثاء فتيران العربي الزاولي برسم الدورة 7 من البطولة الاحترافية لكرة القدم.

وخلال الندوة الصحافية من ورا ماتش الرجاء الرياضي والجيش الملكي اللي سالت بالتعادل السلبي زيرو لزيرو، وضح سا بينتو مدرب الرجا وقال: “اللاعبين اللي مزيانين فالبينالتيات كانو خرجو بحال بوزوق والنفاتي وبوگرين ورويدة كان فاتيگي وما يقدرش يلعب البينالتي ودرت الثقة فالحسين رحيمي ولكن مع للأسف ما قدرش يماركيه وهادي هي الكورة”.

ونايض الصداع على الحسين رحيمي بسبب ضربة الجزاء اللي ضيعها وضيع معها الرباح على الجيش الملكي، وجمهور الرجاء الرياضي ما تقبلش كان ريحيمي اللي ماشي رسمي مع الفريق تعطاه ضربة جزاء يلعبها.