كود سبور- برشيد//

انتقد البرتغالي ريكاردو سا بينتو مدرب الرجاء الرياضي، التيران البلدي ديال برشيد وقال إنه ما زوينش، وهاذ الشي بعدما لعب فيه اليوم الاحد ضد حسنية أكادير ضمن منافسات البطولة الاحترافية.

ريكاردو سا بينتو مدرب الرجاء الرياضي وخا ربح أول ماتش له مع الخضرا وكان هذا الشي فتيران برشيد بنتيجة 3 لواحد على حسنية أكادير، قال فتصريح له بعد الماتش: “صعيب تلعب فهاد الملعب ومازوينش وماشي ديال تلعب فيه الكورة فالارض ولكن تقنا فريوسنا وتحكمنا فالماتش وربحنا”.

من جهة أخرى، وحسب ما توصل به “گود” من معلومات، فالمسؤولين على تيران برشيد ما بغاوش يفزگو عشب الملعب واخا الرجا طلبو منهم هذا الشي، ومعروف أن الرجا كايحتاجو للعشب يكون فازگ باش يلعبو مزيان بالأسلوب ديالهم اللي كايعتامدو فيه على الكورات القصيرة فالأرض.