كود سبور//

كشف الدولي المغربي رومان سايس على شنو وقع ما بين حكيم زياش والناخب الوطني السابق وحيد حاليلوزيتش، وكيفاش جرا عليه من المنتخب المغربي.

وهضر رومان سايس فبودكاست club des 5 على الواقعة بين حكيم زياش ووحيد حاليلوزيتش، وقال: “كاين حكيم زياش كايدير ماساج ملي عيط له واحيد حاليلوزيتش للبيرو ديالو، ولكن قرر ما يمشي عندو حتى يكمل المساج، والمساعدين هما اللي كانوا وسيط بيناتهم، ومن بعد جا عندي زياش وقاليا راني غادي بحالي من المعسكر، وأنا نسولو “أش هذا الشي كاتقول ياك يالاه جيتي”، وهو يقوليا بشكل عام راه المدرب جرا عليا وما غاديش نبقى”.

وكمل الكابيتان السابق ديال المنتخب المغربي: “بالليل درنا اجتماع كبير مع زياش ووحيد حاليلوزيتش ورئيس الجامعة وأنا اللي كنت مكلف بالترجمة بين الرجلين (اللاعب والمدرب) ما ترجمتش كلمة بكلمة واختاريت احسن الكلمات وتهدنت القضية والغد له خاليوليزش قال من الأحسن نبداو صفحة جديدة”.

وزاد سايس، وقال: “فالمعسكر اللي من وراه عيط ليا حكيم زياش وقاليا إلى بغيتي نمشيو بجوج للمعسكر، قلت له راني عندي ماتش فلندن وغانبات هاديك الليلة تما والغد له انت لاعب يسالي الماتش ديالك ونمشيو فالطيارة، وقاليا أوكي واخا، وملي خرجت اللائحة ما كانش فيها حكيم زياش، وخاليلوزيتش كان دار ندوة صحافية دمر فيها زياش”.