كود سبور//

مازال ما استوعب الدولي المغربي السابق رومان سايس، الطريقة كيفاش ضيع الدولي المغربي براهيم دياز بينالتي ضد السنغال ففينال كأس إفريقيا 2025، واللي كانت من أسباب خسارة النهائي واللقب، وهذا الشي كايبين أن الفيستيير ديال المنتخب المغربي ورا كوب دافريك ما كانش هو هذاك واللاعبين كاعيين من براهيم دياز بسباب البينالتي اللي زگل، وطبعا هذا الأمور كاتبيين أن الناخب الوطني الجديد محمد وهبي تبعاه خدمة كبيرة باش يصفي الأجواء المشحونة.

وخلال حوار له مع موقع “فوت ميركاتو” الفرنسي، هضر رومان سايس وقال: “ملي بغا يضرب البينالتي درت وشديت راسي بيدي، وقلت عمر شي حد ما زعم يدير هذا الشي، راه ممكن يضيع بينالتي، ونجوم قبل دياز زگلوه بحال أشرف حكيمي وحكيم زياش، ولكن ملي براهيم بغا يضرب البنالتي قلت مع راسي لا ما يمكنش يدير هذا الشي دابا”.

وكمل سايس وقال: “كانت اللحظة الأخيرة، راه دازت 50 عام على آخر تتويج بكاس أفريقيا وكثر من 20 عام على آخر وصول لفينال د الكان، ودابا على أرضنا… كان يماركيها بجهد وسط الشبكة وصافي شكرا بسلامة”.

وزاد سايس وقال على اللي راج بخصوص ان براهيم دياز زگل البينالتي بلعاني، وقال: “لا ما يقدرش يدير هذا الشي فهاد المستوى، براكا من التخربيق، كان يقدر يكون بطل ولكن هو بغا يكون بطل خارق، وكانتأسف له حيث هذا الشي كايضر شويا بالمشاركة ديالو فكاس افريقيا، واللي كانتمنى له وانا كانفكر فمصلحة المنتخب هو يستافد من هذه التجربة فالمستقبل”.