كود سبور//

مازال الدولي المغربي رومان سايس باغي يلعب مع المنتخب المغربي، وما كايفكرش انه يعتزل دوليا كيفما كان كايروج، وبخصوص انه غايجي للوداد قال ان هذا الشي غير اشاعات.

وخلال حوار له مع قناة “الكاس” القطرية، تكلم رومان سايس مدافع السد القطري، على اخبار الاعتزال الدولي، وقال: “لا كانت غير اشاعات، من بعد اي مسابقة كبيرة ممكن نفكرو فهادشي ولكن فالداخل ديالي كنت عارف أنني ما باغيش الاعتزال واخا ندوز شي مرات بشي وقت صعيب، ولكن كنت ديما عارف انني إلى كنت فالمستوى ديالي البدني مزيان غانقدر مازال نلعب مع المنتخب المغربي”.

واكد رومان سايس: “اللعب للمنتخب المغربي وتمثيل المغرب هو اهم حاجة فالمسيرة ديالي، واذا كان بإمكاني نلعب ونعاونو راني موجود، وما فكرتش نعتازل، وقاليا ولدي بلي ما باغينيش نعتزل مع المنتخب المغربي وانا ملتزم باش ندير له خاطرو”.

وبالنسبة لما راج واحد الوقت على أن هناك اتصالات بين سايس والوداد الرياضي باش يلعب معهم، كشف المدافع المغربي: “بخصوص اللعب فالمغرب.. عارف كلشي كايسول على حقيقة عرض فريق الوداد الرياضي، وانا شفت الخبر بحال اي شخص آخر، ولكنها كانت مجرد اشاعات وما كان عندي حتى شي اتصال مع الوداد نهائيا، كانت عندي اتصلات مع أولمبيك مارسليا الفرنسي كان كلشي واجد ولكن ملي جا المدرب الجديد مارسيلينو سالا كلشي وما وقعناش العقد”.