كود – وكالات//

بدا البارح الثلاثاء 7 يوليوز أول سباق ديال الثيران فمهرجان سان فيرمين 2026 بمدينة بامبلونا الإسبانية، وسط حضور آلاف المتفرجين والمشاركين اللي كيجريو قدام الثيران فواحد من أشهر المهرجانات الشعبية فالعالم.

هاد العام تفتحات الدورة بثيران اللي جاية من منطقة قادس، وقدرو يدوزو المسار كامل فجوج دقايق و20 ثانية، السباق كان سريع بزاف، وطيح بزاف دناس، ولكن ما تسجلات حتى إصابة خطيرة بگرون الثيران.

سباق الثيران كيبدا مع 8 ديال الصباح من حي سانتو دومينغو، وكيدوز من شوارع القدام ديال بامبلونا حتى كيوصل لحلبة مصارعة الثيران، وكيشارك فيه كل عام آلاف الناس، سواء من إسبانيا ولا من دول أخرى، وخا الخطورة اللي كتميز هاد العادة .

مهرجان سان فيرمين، من أشهر الاحتفالات فإسبانيا وكيتنظم كل عام من 6 حتى لـ14 يوليوز بمدينة بامبلونا، عاصمة منطقة نافارا، أصل المهرجان قديم، وكان فالبداية احتفال ديني على اسم القديس سان فيرمين، اللي كيتعتابر حامي المدينة. ومع مرور الوقت تزادت ليه الاحتفالات الشعبية والأسواق، ومن بعد ولى سباق الثيران أشهر فقرة فيه.

شهرة سان فيرمين وصلات للعالم كامل بفضل الكاتب الأمريكي إرنست همنغواي، اللي كتب على المهرجان فرواية “الشمس كتشرق حتى هي”، ومن تما ولى كيجيب اكثر من مليون زائر كل عام، وخا الشعبية الكبيرة ديالو، مازال كيدير نقاش بسبب المخاطر اللي كيتعرضو ليها المشاركين، وحتى بسبب الانتقادات ديال جمعيات الرفق بالحيوان.