كود – وكالات//

فخطاب دارو فصباح اليوم الأربعاء جدد رئيس الوزراء الإسباني بيدرو سانشيز الرفض ديال بلادو للهجوم اللي دارتو مريكان وإسرائيل على إيران، وحذر إيلا بقا هاد التصعيد يقدر يجرّ المنطقة والعالم لعواقب خايبة، وجا هاد الكلام فخطاب متلفز وجهو للشعب الإسباني.

سانشيز قال باللي ’’هكذا كتبدأ الكوارث الكبيرة ديال البشرية”، وضاف أنه ما يمكنش ’’نلعبو الروليت بمصير الملايين”، وأكد باللي موقف الحكومة ديالو واضح ويمكن يتلخص فعبارة وحدة: ’’لا للحرب”، وزاد كال أن الحوار والدبلوماسية هما الطريق باش كتحل الأزمات.

وجات هاد التصريحات من بعد ما هدد الرئيس الأميركي دونالد ترامب بقطع العلاقات التجارية مع مدريد بسبب موقفها من النزاع، سانشيز لمح باللي إسبانيا ما غاديش تبدل الموقف ديالها غير باش تفادى أي ضغط أو إجراءات انتقامية.

كما رجْع سانشيز لحرب العراق، وقال إن النتائج ديالها كانت ثقيلة، من ارتفاع ثمن الطاقة حتى لعدم الاستقرار والإرهاب، واعتبر أن أي هجوم جديد على إيران يقدر يزيد يعقد الوضع الدولي عوض ما يجيب حلول .