كود الرباط//

علمت “گود” من مصدر مطلع، بلي هاد الصباح الاثنين 16 يونيو 2025، كان اجتماع مهم بوزارة العدل لسد الثغرات السيبرانية لي تعرضت ليها منصة توثيق ديال الموثقين، وتم فيه الاتفاق على وضع شروط صارمة على الموثقين باش يدخلو لمنصة جديدة محمية خاصة بالتوثيق.

فهاد الاجتماع، لي حضر فيه علي بيطار رئيس المجلس الوطني للموثقين، وممثلي عن المحافظة العقارية ومسؤولين بوزارة العدل، والهدف منو هو وضع حد للهجوم  السيبراني الأخير لي استهدف منصة الموثقين وعلى إثرها تم تسريب معطيات شخصية لشخصيات نافذة.

وفهاد الاجتماع تقرر وضع شروط واضحة على الموثقين باش يدخلو بأمان لمنصة التوثيق، ابتداء من اليوم، ومن الشروط طبعا أنه على كل موثق التوفر على حاسوب محمي ويكون مرتبط بالمنصة، وطبعا لي مدارش هادشي مغاديش يدخل للمنصة.

منصة تدبير العقود “توثيق”، دبا رجعت للخدمة من اليوم، مور هاد الاجتماع بعدما تم إفراغ منصة الموثقين من جميع المعطيات وحمايتها.

يشار بلي منصة توثيق توقفات لأيام مما أدى إلى تعطيل معاملات نقل الملكية وتسجيل وتحفيظ مئات العقارات، بسبب عملية تنظيف سيبرانية للتحقق من المنصة وتأمينها، بعد الاختراق الذي نتج عنه تسريب بيانات.