محمد سقراط-كود///

ساكن في حي جديد ديال الطبقة الوسطى في أطراف المدينة، الساكنة فيه قليل نسبة من الديور ديال الجالية والأحياء المجاورة عبارة على فيلات، ومع ذلك دايرين بينا خمسة ديال الجوامع ومن بينهم جوامع كبار بزاف، هادشي في مساحة صغيرة نسبيا، بينما مكايناش جردة وحدة، كاين مناطق خضراء عبارة على أراضي خاوية ديال ماليها كابر فيها الربيع فقط، حديقة وحدة مجهزة ومقادة ومأمنة وفيها ألعاب الأطفال وممرات للمشي، لا والو مكايناش، مكاين حتى مكتبة أو دار شباب أو الشياب أو ساحات للرياضة، كاين فقط القهاوي والمطاعم والمدارس الخاصة، مدارس الدولةً بعاد علينا شوية وعموما قلال بينما المدارس الخاصة بالعرام، وسط الحي كاين جوج من الأكبر في المدينة ووحدة كندية بعيدة بأمتار قليلة، بينما مكاين حتى وحدة ديال الدولة، طبعا مكاينش قاعات للرياضات المتنوعة وتكون ديال الدولة كتخلص اشتراك بسيط وتدخل.

هاد الأطفال لي هنا مكتعرفهم الدولة في والو، نهار لحد كيخرجوهم والديهم لفضاءات خاصة جنب المدينة فيهم ألعاب الأطفال باش يلعبوا ويفوجوا، باقي الأسبوع كيقراو في مدارس خاصة، مشتاركين في أندية ديال الكرة أو السباحة أو الكاراطي كولشي خاص، طبعا التطبيب وقطاع الصحة عموما خاص حيت مكاين حتى شي مستوصف حدانا، فاش كيخرجوا للزنقة يلعبوا راه كيمارسوا أنشطتهم وسط الطريق حيت مكاينش فين وحتى إلى كان راه بعيد، الحومة واخا صغيرة عامرة غير بالخدمات الخاصة مدارس حضانات ألعاب الأطفال لاصالات، الجامع هو لي فابور هنا ومنو بزاف.

الفضائات العامة، وخصوصا في الأحياء الشعبية والهامشية بعض المرات كتحول لنقط سوداء ديال الجريمة وبيع المخدرات والكريساج، ولكن في نفس الوقت راه ضروري خاص الدولة وأجهزتها يوفروا ويفكروا لهاد الأجيال لي طالعة كيفاش باغينها تكبر وهوما ماواصلينها بوالو، راه بحال أحياء الفيلات بحال البرارك كاين غياب شبه تام للحدائق والمرافق الترفيهية والاجتماعية والرياضية، شوف مثلا حي كبير هنا في فاس بحال بنسودة ولي كان كاريان واستافدوا عطاوهم بقاعي بناوهم، ولي هو حومة شباط وهو المرشح ديالهم منذ القدم، هذا راه حي كبير وجردة هي اللخرة مافيهش، وفي اللخر تبقى تسائل الدولة علاش في بداية الألفينات كانوا سيطروا عليه المتشددين وولاو هم حكامه الفعليين، ولحد الآن باقي الأثار ديالهم موجودة تم، وبزاف ديال الملتحقين لمناطق النزاع من تم ومن أحياء بحال هادي لي عبارة على صنادق ديال السيما، والناس عايشة فيهم بالأساسيات ديال بداية العصر الزراعي هادي عشرالاف سنة، بنادم كياكل ويخرى فقط، وفاش كيبغي يفكر أو يفوج أو ينشط كيلقى جوج خيارات فقط إما البزناز أو الجامع.