بني ملال -كود//

ساكنة دوار تيفرت نايت حمزة فإقليم أزيلال دخلات فـ اعتصام مفتوح قدام مقر الجماعة، احتجاجا على التهميش لي كيعانيو منو، وخصوصاً على تعطال مشروع تعبيد طريق أفرا–ازݣزا لي باقي من 2016 وهو غير على الوراق.

المحتجين عبّرو على الغضب ديالهم من هاد التأجيلات ليكتعاود، وقالو باللي الوضعية الحالية ولات كتخسر الخاطر وكتزرع اليأس فالنفس ديالهم وكتفقدهم الثقة فالمؤسسات. وطلبو من المسؤولين يديرو متابعة صارمة للمشاريع ويحاسبو أي واحد مقصّر، باش يكون التزام حقيقي بتنمية المنطقة وتوفير الحاجيات ديال المواطنين.

فهاد الاعتصام، الساكنة شدّدو باللي هاد الطريق ماشي غير مشروع عادي، ولكن مطلب أساسي باش يتفك العزلة على الدواوير ويتربطو بباقي المناطق. التأخر ديال الأشغال زاد غير ف معاناة التنقل وظروف العيش اليومي.