كود كازا ///

وجهات االسابقة مليكة العامري رسالة لسيدنا عبر “كود”٬ وقالت فتصريح “التمس منكم فهاد ليام الاخيرة من رمضان بصفتهم القاضي الاول للبلاد والساهر على تطبيق القانون٬ تعيين لجنة محايدة للتحقيق فالملف العقاري ديالنا” واضافت القاضية مخاطبة سيدنا “غاديين تكتاشفو جلالة الملك حقائق مهمة ولهم مني اسمى عبارات التقدير والاحترام”

القاضية كانت خرجات قبل يومين من الحبس بعد قضائها 8 اشهر حبس. الفيلم بدا باش حسات بالحكرة ودارت هاد السبعينية فيديو جبدات فيه ملف عائلتها ديال 150 هكتار ببرشيد وتدخل من وصفتهم جهات باش ياخدوه.

كان تحكم عليها فهاد القضية ف19 شتنبر 2024 بابتدائية عين السبع فكازا ب3 سنين حبسا نافذا. قبل ما تنقص وتولي 8 اشهر.

القاضية توبعت فاللول ب”بث و توزيع ادعاءات ووقائع كاذبة بهدف المس بالحياة الخاصة للأشخاص” و”التشهير بهم وإهانة رجال القضاء” و”إهانة الضابطة القضائية بالتبليغ عن جريمة يعلم بعدم حدوثها”، و”إهانة هيئة منظمة قانونا و”تحقير مقررات قضائية بواسطة الأقوال لقصد المس بسلطة القضاء واستقلاله”، و”الإدلاء علنا بأقوال قصد التأتير على قرارات رجال القضاء قبل صدور حكم غير قابل للطعن”.

ولكن اش قالت؟ قالت فداك الفيديو الشهير باللي القاضي اللي غادي يحكم فهاد القضية ديال 150 هكتار فبرشيد كتعرفو ووجهات لسيدنا باعتبارو “القاضي الاول” و”الضامن لحقوق شعبك”. ناشدات سيدنا باش “تنصف شعبك وتخصص لجنة لفضح الفساد” فاحالة لهاد القضية.
قبل هاد الشي كانت جبدات القاضي اللي غادي يحكم فالنقض واسمو منصف حسن. القاضية السابقة قالت فحديثها عن قضيتها “وضمت اليه هيئات اخرى دون ان يطلبها احد من الخصوم. وترأسها شكون؟ منصف حسن. معروف الماضي ديالو”

ثم اضافت موجهة كلامها لسيدنا “مللي حسيت بالحگرة والظلم التاجأت الى عدة منظمات وهيئات قضائية. ضامنو معايا وقالو لي ما عندنا ما نديرو ليك دابا. .كتبت لجميع الجهات المختصة”

دابا خرجات واخا المرض وتجربة السجن مصرة باللي حقها مهضوم. مصرة دافع عليه. مصرة ان سيدنا يشكل لجنة فهاد الملف باش يتفرشو شكون وراه كيف قالت ففيديو كان سباب فاعتقالها.

بنتها كانت صرحات باللي كاينة سرعة غير مسبوقة فطي هاد الملف.

القضية فيها شفعة ديال شي حد فهاديك 150 هكتار وكان قدم شكاية وبقات منسية حتى خرجات. حكمات عليه المحكمة. عائلة العامري كتقول باللي ما عندوش حق الشفعة. القضاء قال عندو. دابا الارض كانت تباعت ودخلات للتسجيل والتحفيظ. يعني بلغة القانون تم تطهيرها. الفيلم اليوم هو يطعنو اللي ورا صاحب الشفعة فالتسجيل والتحفيظ.

فهاد الشي كولو القاضية السابقة باغية دير معركة كبيرة دفاع على حق عائلتها