كود كازا //

الطفل زكرياء، ميسي التروتينيتات، قدر يهرب من مركز حماية الطفولة فابن سليمان مورا ساعات قليلة من بعد ما صدر القرار ديال السيد قاضي التحقيق بالمحكمة الزجرية فكازا باش فهاد المركز باش يحموه من الاستغلال اللي كيتعرض ليه من عشيق مو ، واللي حسب على ما قال الأب انه هو المسؤول الرئيسي على جميع المسروقات، بمشاركة وموافقة الأم.

القضية ديال زكرياء كانت شغلات الرأي العام هاد الأسبوع، خصوصاً من بعد ما انتشرات فيديوهات كتوثق عمليات السرقة اللي كان كيديرها فالبيضاء، وهاد الشي خلا السلطات تدخل وتوقف النزيف.

لكن المفاجأة الكبيرة هي أن الطفل هرب من بعد ما تحط فالمركز، وهاد التطور غادي يزيد يعقد القضية اللي دارت جدل كبير بين اللي كيشوفوه ضحية استغلال، واللي كيشوفوه مجرم صغير خاصو التأديب.