كود – وكالات//

النجم السنغالي ساديو ماني رجع لدارو فبامبالي، فجهة كازامانس، ولكن هاد المرة ماشي باش يلعب الكرة، وإنما باش يدير مشروع فلاحي صناعي كبير كيراهن عليه باش يساهم فتنمية المنطقة ويخلق فرص شغل جديدة.

نهار السبت 19 شتنبر، ماني دشن مشروع SM10 Agro، لي هو مركب فلاحي صناعي مخصص بالأساس للمانگا.

اللاعب السنغالي مستثمر 11.7 مليار فرنك إفريقي فهاد المشروع، اللي غادي تكون عندو قدرة لمعالجة 8500 طن من المونگ فالعام، مع توقعات بخلق أكثر من 1000 منصب شغل مباشر.

ماني، اختار يستثمر فبلادو والمنطقة اللي تزاد فيها، قال للمسؤولين الحكوميين اللي حضرو للمناسبة إنو ما باغيش يبقى اسمو مرتبط غير بالأهداف والانتصارات ديالو فوق الملعب.

ماني قال إن المشروع غادي يساهم فخلق فرص الشغل والتنمية الفلاحية، ويبين بأن الشباب ديال كازامانس يقدرو يبنيو مستقبلهم فوق الأرض ديالهم، بلا ما يكونو مضطرين يمشيو يقلبو على فرص ما لقاوهاش فالمنطقة.

المشروع غادي يدخل مرحلة الإنتاج ابتداءً من مارس 2027، بثلاثة مصانع متخصصة فإنتاج لبّ المانگا وزبدة المونگ، كما غادي يكون فيه مركز للتكوين متخصص فمهن الصناعات الفلاحية والغذائية.

وزيرة الصناعة والتجارة السنغالية، سيرين غوي ديوب، اعتبرت أن استمرار خروج الموارد من المنطقة بلا ما يتم تحويلها وتثمينها كيحرم الاقتصاد المحلي والوطني من قيمة مضافة مهمة. وقالت بلي مشروع SM10 Agro بقيادة ساديو ماني وشركائه كيمثل حلاً عملياً لهاد المشكل.