گود سبور//

احتفل الألماني جوزيف زينباور مدرب الرجاء الرياضي مع فريق باير ليفركوزن الألماني والمدرب ديالو الإسباني تشابي ألونسو، حيث ربحو بطولة ألمانيا لأول مرة فتاريخ النادي البارح الاحد.

جوزيف زينباور مدرب الرجاء الرياضي اللي كينافس مع الخضرا على لقب بطولة المغرب وربح البارح بالليل فريق شباب المحمدية بنتيجة 2 لزيرو فالدورة 25، عبر على الفرحة ديالو حيث باير ليفركوزن ربح البوندزليگا، واختار الاحتفال معه، وقال فتدوينة على أنستغرام: “ملي كنت مدرب ديال فريق Hamilton فألمانيا، وأنا كنتخايل شنو كيعني تحقيق المستحيل، كيفما دار تشابي ألونسو وباير ليفركوزن”.

وكمل مدرب الرجا: “كنبارك لليفركوزن وما يمكنش نخلي هاد الفرصة تدوز بلاما نحتفل معهم ومع تشابي ألونسو بهاد الإنجاز فبطولة ألمانيا، وخاصهم يتفكرو أن ألونسو شد ليفركوزن ملي كان الفريق فقاع الترتيب الموسم اللي فات، واليوم ربحو معه بطولة ألمانيا بلا ما يخسرو حتى ماتش، وربحو فيردر بريمن بخمسة لزيرو، وضمنو اللقب قبل دورات من نهاية الموسم، ومبروك عليهم هذا الإنجاز التاريخيّ واللي گاعما مسبوق، ومبروك على ليفركوزن كاملين اللي وقفو سيطرة بايرن ميونخ الطويلة على بطولة ألمانيا”.

واستغل جوزيف زينباور تتويج باير ليفركوزن ببطولة ألمانيا، وعطى بهم المثل للرجاء باش يبقاو مؤمنين بالحظوظ ديالهم فالمنافسة على لقب البطولة، اللي مضاربين عليها مع الجيش الملكي المتصدر بفارق 4 النقاط على النسور، وقال: “إنجاز ليفركوزن ألهم گاع العالم، وهذا الشي بغيتو ينعكس على الفريق ديالي، وخاصنا نآمنو بالمستحيل مع الرجاء، والهدف ديالنا نبقاو بلا خسران بحال ليفركوزن، ونرجعو البطولة وكأس العرش لكازا”.