كود سبور//

ما بقاش الدولي المغربي حكيم زياش مرتاح مع گلطة سراي التركي، وممكن يمشي بحالو من الفريق خلال المرحلة المقبلة.

حكيم زياش وبعد حملة الانتقادات اللي توجهت له من طرف جماهير گلطة سراي التركي مؤخرا، كان رد الفعل ديالو هو انه مسح گاع الصور ديالو بتوني گلطة سراي من “أنستغرام”، وهذا الشي كايبين أن اللاعب ما بقاش مرتاح مع الفريق التركي، وانه بالفعل عندو مشكل مع مكونات النادي.

وحسب موقع “فوت ميركاتو” الفرنسي، المهتم بانتقالات اللاعبين والمدربين فأوروبا، فالدولي المغربي حكيم زياش باغي يرجع يلعب فهولندا، وبالضبط مع الفريق ديالو السابق أياكس أمستردام، والأخير حتى هو باغيه يرجع للصفوف ديالو، وهذا الشي بعدما اللاعب المغربي حس بأنه ما بقاتش عندو بلاصة فگلطة سراي التركي، خصوصا وانه ما كايلعبش بزاف مؤخرا وبدا هذا الموسم احتياطي، وإلى جانب امكانية الرجوع إلى أياكس أمستردام، كاين عند زياش خيار الانتقال إلى البطولة السعودية حسب ما قال نفس المصدر.