كود سبور//

واصل الدولي المغربي حكيم زياش تفجير المفاجأت للفريق ديالو گلطة سراي التركي، وهذه المرة شرط عليهم ياخذ المستحقات ديالو كاملة اللي عندو فالعقد مع النادي باش يمشي بحالو خلال الانتقالات الشتوية المقبلة بلاما يتسنا نهاية العقد ديالو معهم مع نهاية هذا الموسم، حسب ما كشف عليه موقع NTV sport التركي.

ووضح الموقع التركي، أن قيمة الشرط الجزائي لفسخ العقد بين گلطة سراي وحكيم زياش القيمة ديالو 5.5 مليون أورو، وأن اللاعب المغربي طلب من إدارة گلطة سراي تعطيه المستحقات ديالو كاملة مقابل أنه يمشي بحالو فالميركاتو الشتوي المقبل حيث باغي يلعب ومعهم ما كايلعبش، وأنه بالفعل كايقلب على فريق جديد يلعب معه.

وأكد نفس المصدر أن حكيم زياش ما بقاش باغي يبقى مع گلطة سراي، اللي غايسالي العقد ديالو معهم يوم 30 يونيو 2025، مع العلم أن هذا العقد فيه إمكانية التجديد لموسم إضافي، ولكن اللاعب المغربي غالبا غايمشي قبل ما يسالي العقد الحالي، حيث كاعي بسبب عدم اللعب مع الفريق والبقاء فالاحتياط، وحتى الفريق التركي ناويين يفكو معه الجرة بأقل الخسارات ويتفاوضو معه لفسخ العقد.