أحمد الطيب – كود الرباط//
علمت “گود” من مصادر مطلعة، أن وزير الصحة والحماية الاجتماعية، أمين التهراوي، أمر الكاتب العام للوزارة بتشكيل لجن تفتيش مركزية مكونة من مسؤولين ومديري مديريات مركزية، للقيام بزيارات مفاجئة لعدد من المستشفيات والمراكز الصحية بمختلف الأقاليم، بعد توصلها بشكايات متكررة من المواطنين حول غياب الأطر الطبية والصحية.
اللجنة حلت خلال الأيام الماضية بعدة مستشفيات، من بينها مستشفيات بتاونات وتازة، حيث وقفت على عدد من الاختلالات الخطيرة خصوصا هروب الأطباء للقطاع الخاص واخا كيتخلصو من الدولة.
هاد اللجان فاش بداو يتحركو، نوضو الرعب ف الأطر الصحية السلايتية للي كيفضلو يسلتو يخدمو ف البريفي بلاصت ما يخدمو الساعات القانونية لي عليهم. القضية دبا فيها انذارات وتوقيفات.
الفضيحة الكبرى، كانت أول لبارح بالليل (مع ديك 11 دليل يوم الاثنين)، لجنة مركزية دارت زيارة خاطفة لمستشفى مولاي عبد الله بسلا. اللجنة لقات غير السيكيريتي فغياب شبه تام للأطر الطبية والصحية، باستثناء بعض المتدربين.
هذا الوضع غير المسبوق أدى إلى استنفار كبير داخل المستشفى، بحيث حضرات صباح لبارح جميع الأطر الطبية والصحية بشكل مكثف، لدرجة أن عشرات السيارات ملقاتش فين تبلاصي قدام المستشفى.
وتأتي هذه الزيارات في سياق إعلان سابق للوزارة يوم 18 يوليوز الماضي، طالبت فيه الأطباء الاختصاصيين من فوجي 2023 و2024 بالالتحاق بمقرات عملهم قبل 4 غشت 2025، مع التأكيد على مباشرة مسطرة التخلي عن الوظيفة وتوقيف الأجرة في حق المتغيبين ابتداءً من 15 شتنبر 2025، إضافة إلى منعهم من المشاركة في الحركات الانتقالية المقبلة.
هاد الزيارات خصها تسالي بعقوبات صارمة، باش كولشي يدخل ويخدم وميبقاوش يتلاعبو بصحة المواطنين، تقول مصادر من الوزارة لـ”گود”.
وسبق لنفس المصادر أن أكدت لـ”گود” أن وزارة الصحة معندهاش مشكل ف الموارد البشرية سواء الأطباء او الممرضين او الأطر التقنية والصحية، بل عندها مشكل الحكامة والتنظيم والتوزيع. واش غاتكون لمسة التهراوي فهاد الجانب التنظيمي والحكامة هي لي تفك هاد الفوضى لي كتعيش سبيطارات المغرب؟. مع الوقت كولشي يبان.
