كود مازا//

عرفات الولايات المتحدة حدت تاريخي بعدما فاز زهران ممداني بمنصب عمدة مدينة نيويورك سنة 2025، باش يولي أول مسلم ف هاد المنصب فتاريخ المدينة، وواحد من أصغر السياسيين لي وصلوا ليه. فوز ممداني تعتبر لحظة استنائية ف فالمشهد السياسي الأمريكي، حيث كيمثل جيلاً جديدا من القادة الشباب اللي كيطالبو بإصلاحات اجتماعية جذرية لصالح الفئات الضْعيفة.

ممداني، اللي عندو أصول من أوغندا وكيعيش فحي كوينز الشعبي، دخل الانتخابات بشعار العدالة الاجتماعية والكرامة للجميع. برنامجو الانتخابي دار الروينة، خصوصاً أنه كيحمل مجموعة من الوعود الجريئة اللي كتستهدف التغيير الحقيقي فمدينة معروفة بغلاء المعيشة وتفاوت الدخل الكبير بين سكانها.

زهران ممداني قال أنه غادي يهبط تكاليف المعيشة والكرا بتجميد تمن الإيجار في المساكن اللي داخلة ضمن نظام “rent-stabilized”، وغادي يبني كثر من 200 ألف وحدة سكنية ميسْرة فالأعوام الجاية باش يواجه أزمة السكن اللي كيعانيو منها آلاف الأسر.

ومن أبرز النقاط اللي شدات الانتباه فبرنامجو هو الوعد ديالو بــ باش يخلي طوبيسات فابور فإطار سياسة جديدة ديال التنقل وتقليل المصاريف على المواطنين، خصوصاً العمال والمهاجرين. وزاد أنه غادي يرفع الحد الأدنى للأجور ل 30 دولار فالساعة بحلول سنة 2030، حيت كيشوف أن الأجور الحالية ما كافياش باش الناس تعيش بكرامة فمدينة غالية بحال نيويورك.

وفي الجانب المالي، كيتعهد ممداني بـ رفع الضرائب على الأغنياء والشركات الكبرى، واستعمال المداخيل الإضافية فتمويل البرامج الاجتماعية والإسكان والنقل والتعليم. وكيأكد أن العدالة الضريبية ضرورية باش تكون المدينة ديال كلشي.

العمدة الجديد شدد على التزامو بدعم الفقراء والمهاجرين والمسلمين ومجتمع الـLGBTQ، وبالخصوص الفئات اللي كتعاني من التمييز والكراهية، وقال إن نيويورك خاصها تكون مدينة كيحس فيها الجميع بلمان والانتماء.

بزاف من المراقبين كيشوفو أن زهران ممداني رمز لجيل سياسي طالع كيبغي يبدل السياسات باش تكون أكثر إنسانية وعدل ماشي غا فمريكان ولكن حتى فالعالم .