گود سبور//

نايضة فـ جزيرة زنجبار التنزانية قبل ماتش الوداد الرياضي والضيف ديالو عزام التنزاني، اليوم الجمعة ضمن الجولة الثانية من دور مجموعات كاس الكونفيدرالية الإفريقية.

وحسب ما توصل به جورنال “گود” فـ جزيرة زنجبار عايشين اجواء استثنائية اليوم الجمعة وهما كايستقبلو الوداد الرياضي، وبحال عندهم العيد، حيث غايشوفو نجوم الوداد عندهم فـ بلادهم.

فريق عزام التنزاني، باغي يرجع الضغط اللي عليه وهو كايستقبل الوداد الرياضي إلى حافز، وناضو المسؤولين ديالو كايفرقو فـ التيكي فابور على الجمهور ديالهم، وما بقاوش مسوقين يدخلو لفلوس فـ هاد المباراة، المهم عندهم هو يعاونهم الجمهور باش يخرجو بنتيجة إيجابية قدام الوداد، وأنهم يديرو المفاجأة.

الماتش ديال الوداد الرياضي وعزام التنزاني غادي يبدا مع 5 العشية بالتوقيت المغربي فـ تيران “أمان” بجزيرة زنجبار التنزانية، وباغيين الوداد يرجعو منو بالرباح باش يبقاو فـ صدارة المجموعة الثانية.