كود سبور//

كانت بداية العمل ببطاقة الملاعب فالتيرانات المغربية من خلال ماتش الديربي بين الرجاء والوداد الرياضيين فتيران العربي الزاولي، برسم الدورة 11 من البطولة الاحترافية لكرة القدم، (بداية) ناجحة بكل ما تحمله الكلمة من معنى.

وكان التنظيم فالماتش اللي سهرت عليه الجمعية الوطنية للإعلام والناشرين ناجح بزاف، والحقيقة هو أنه لأول مرة كايحس فيها الصحافي والمصور الصحافي أنه فالبلاصة المناسبة، وهذا الشي بعدما خدات الجمعية المبادرة بشراكة مع العصبة الوطني لكرة القدم الاحترافية والجامعة الملكية المغربية لكرة القدم، لتنظيم قطاع الصحافة الرياضية بالمغرب، ووضع حد للعشوائية اللي كانو متسببين فيها جمعيات كايستغلو الهشاشة والضعف ديال عدد من الصحافيين والمنتسبين لهم باش يستغلوها لخدمة مصالهم الشخصية.

الدخول لتيران العربي الزاولي كان بشكل سهل بزاف بالنسبة للصحافيين اللي عندهم بطاقة الملاعب، حيث اللي عندو كايدخل للتيران وكايلقى مسؤول فالاستقبال ديالو كايتأكد من بطاقة اللاعب واش أصلية أو لا، ومن بعد الصحافي كايقدر يدخل ياخد بلاصتو فالتيران، وكل الظروف موفرة له وحتى أبسط الأمور بحال الما والكافي والبيفي بين الشوطين وطبعا هذا الشي راه ما كانش من قبل فماتشات البطولة.

وعرفت انطلاقة العمل ببطاقة الملاعب حضور ادريس شحتان رئيس الجمعية الوطني للاعلام والناشرين، اللي كان هو اللجنة المسؤولة عن تدبير العملية، متواجدين فالتيران لتفقد الامور وكيف دايرة جودة الخدمات المقدمة، وسط تفاعل إيجابي من الصحافيين والمصورين الصحافيين اللي كانو حاضرين باش يخدمو، وحسو بفرق كبير ما بين التنظيم الجديد لعملهم فالتيرانات وما بين زمن السيبا والفوضى اللي كان من قبل، ايام الجمعيات.