كود الرباط//

كشفت مصادر محلية بطنجة، ل گود” أن صداع كبير ناض اليوم في مجلس جماعة طنجة، بعدما قدم رئيس فريق البام بالمجلس امحمد احميدي، استقالته من رئاسة الفريق، بسباب احتجاج العمدة الليموري عليه حيث شارك ف توقيع بيان تضامني مع البرلمانية سلوى الدمناتي للي تعرضت لاهانة شديدة واعتداء لفظي من طرف المكلف بالتواصل لدى العمدة.

الليموري اعتبر توقيع الحميدي بمثابة إدانة ليه حيث بقى ديما متشبث بالمستشار الخاص ديالو الزباخ رغم تورطه في الكثير من الفضائح وله سوابق فالاعتداء على مستشارات ومستشارين، وكان سميتو تجبدت فملف التلاعب بتأشيرة شينغن لدى القنصلية الإسبانية، وسمع له قاضي التحقيق فالملف للي نشأت بسبابة مستشارة عن حزب الاستقلال للحبس.

المصادر ديال “گود” تؤكد انه كاين غليان كبير داخل بيت التراكتور فطنجة بسباب الممارسات الصبيانية ديال الليموري وللي كتأكد كل نهار انه يفتقد للرزانة والنضج، والدليل على ذلك هو جر ثلاثة ديال الأعضاء من البام للمحكمة الإدارية باغي يعزلهوم لأنهم صوتو ضد الرغبة ديالو فتمرير فضيحة سوق سيدي حساين، وراه خسر الدعوى فالمرحلة الابتدائية، ايضا ناس البام كيحملو الليموري مسؤولية توريط المستشار الخاص ديالو المزدوجي فحملة السب والقذف ضد صحافيين ودأبا محكوم استئافيا بعامين ونص د الحبس، واليوم جات الاستقالة ديال رئيس فريق البام فجماعة طنجة وكملات الباهية، وكولشي كيعرف القيمة والوزن ديال الحميدي فالبام، للي هو فنفس الوقت رئيس مجلس عمالة طنجة أصيلة واحد الركائز القوية ديال التراكتور فطنجة منذ 2009.

دابا كولشي كيقول بللي التراكتور فطنجة غادي فالخسران، والليموري شتت الشمل، وبان بللي الهدف ديالو يقصي جميع المنافسين ديالو باش يسيطر على الحزب فطنجة ويرشح الاتباع والموالين ويكون هو الزعيم الأوحد، والسؤال للي محير المناضلات والمناضلين ديال البام هو الدعم المطلق للي عند الليموري من عند بنت الباشا، واش فعلا مقتنعة بيه كوجه قيادي ديال التراكتور او مخدوعة فيه وما قاشعة والو فالتنظيم.
البام تعرض مؤخرا لضربات كثيرة، سياسيا وانتخابيا، وبزاف ديال الاعيان والمنتخبين كيهربو منو، ف سياق الاستعدادات لانتخابات 2026.