كود الرباط//

علمت “كود” أن الخطيب الهبيل الوالي ديال جهة الشرق، بدا الصهد ديالو يوصل لمسؤولين عمروا لسنوات في مناصب المسؤولية، بحيث أعفى رئيس قسم الميزانية والصفقات بالولاية بعد اكتشاف شبهات خروقات كبيرة في عدة صفقات.

قسم الميزانية والصفقات فكاع الولايات فالمغرب، ديما كيثير الجدل خصوصا وأنه ارتباط بعدد من المسؤولين ورجال الأعمال وصحاب المشاريع.

وحسب مصادر “كود” فإن هاد الإعفاء مرتبط بتفعيل مسطرة المساءلة بخصوص عدد من التجهيزات، وكذا كراء منازل لرجال السلطة وصفقات البنزين.

الوالي الجديد لي حرك الملفات الراكدة ورجعت سكة التنمية لمدينة وجدة، حسب مصادر “گود”، كل يوم كيصفي ملفات مشبوهة ورخص تعطات بطرق ملتوية، وآخرها توقيفه صفقة العمر ديال المجلس البلدي وجدة والمتعلقة بأرض لبناء باطوار ولي كان باغي المجلس يشريها من عند واحد سبق تدان في ملف الاتجار في المخدرات، وفيها شبهات تفاهم  مع مول الارض على مبلغ  كبير، لكن الوالي قالهم كاين الأراضي ديال الدولة بأثمنة رمزية لبناء مثل هذه المشاريع.

هاد الصفقة توقفات بسبب المبلغ الكبير للي كان غايشريو به هاد الأرض، مبلغ فايت 3 مليار حسب مصادر محلية بوجدة.