كود سبور//

اكد زكرياء عبوب المدرب الجديد ديال اولمبيك اسفي انه جاي للفريق باش يحقق معه نتائج إيجابية، ويحتل معه المراكز الأربعة الاولين فالبطولة.

وتحدث زكرياء عبوب فتصريح للموقع الرسمي د أولمبيك اسفي غير دابا من صباح اليوم الخميس، وقال: “كنشر المكتب ديال اولمبيك اسفي على الثقة اللي دارو فيا.. الفريق عندو امكانيات ولاعبين مزيانين وجينا باش نديرو هدف ونكونو مع الأربعة الاولين فالبطولة”.

وكمل زكرياء عبوب: “نتمناو نحققو كاع داكشي اللي كيتسناو منا ساكنة مدينة اسفي بالجمهور ديالها اللي كيتعتبر فالسنوات الاخيرة من احسن الجماهير فالمغرب”.

ووضح عبوب: “جينا لآسفي على قبل بروجي سبورتينف باش نحمرو لناس اسفي وجههم باش المدينة ترجع لها الفرحة والتوهج اللي كان فيها الموسم الماضي”.

وزاد المدرب الجديد لآسفي: “بزاف ديال العوامل خلاتني نختار اولمبيك اسفي، حيث فريق طموح وباغي يحقق نتائج ايجابية، والجمهور ديالو ديما باغي الرباح وهذا الشي كيموتيفيك باش تخدم”

وسناو أولمبيك اسفي مع زكرياء عبوب باش يدرب الفريق لمدة 2 مواسم بلاصة التونسي السويدي منير شبيل، اللي صيفطوه بحالو حيث النتائج معه ما كانتش مقنعة.