أنس العمري ـ كود///
رضوان تاغي، زعيم “مافيا موكرو”، كيقلب بكل جهده على محامي باش يساندو فمحاكمة “مارينغو”، وحتى هو صرح بأنه مستعد يقبل أي محامي يجيبو ليه، بلا ما يشوف كفاءتو.
فجلسة استماع اللي تفرجو فيها الناس عبر الفيديو نهار الخميس اللي فات، من سجن “EBI” شديد الحراسة، اللي محتجز فيه، قال المغربي رضوان تاغي اللي كيسعى يستأنف حكم السجن المؤبد عليه، أنه حاول بلا فايدة يلقى محامي يمثلو. وقال: “غنستغل أي فرصة تجيني”.
وزاد وهاجم محكمة استئناف أمستردام، وقال إنهم ماعطوش للمحامين اللي باغيين يدافعو عليه والوقت الكافي باش يحضرو دفاعهم. وقال للقضاة بطريقة وصف بها الوضع: “أنتم بحال سائق قطار سريع ضغط على دواسة الغاز وماعارفش فين مكابح الطوارئ”.
رضوان تاغي كيشير أن صعوبة يلقا محامي جاية من جو ديال الخوف والريبة اللي كيتحاطو به أي محامي يوافق يدافع عليه. وقال “أي واحد يدافع عليا غيولي منبوذ. المحامي غيفكر مرتين قبل ما يقبل”. وزاد وضح “في العادة، كنت غنبقى ساكت، ولكن دابا خاصني نحارب باش نلقى محامي”.
هاد البارون ديال المافيا المغربية محروم من أي تمثيل قانوني من نهار توقف المحامي ديالو السابق، فيتو شكرولا، فأبريل 2025، بتهمة نقل معلومات للمنظمة الإجرامية اللي خدامة فهولندا وبلجيكا وإسبانيا.
وهاد الوضع غير مسبوق، حسب متحدث باسم محكمة الاستئناف، اللي قال إنه من نهار بدات إجراءات الاستئناف، تاغي دار 10 شهور من أصل 19 بلا محامي. والمحكمة كتعترف أن هاد الوضع “ماشي مرغوب فيه” وكتمنى أن المحاكمة تستمر.
