كود ـ تطوان//
عرف باب سبتة ازدحام خانق البارح السبت واليوم الأحد 21 دجنبر 2025، خلا المئات ديال العابرين يتسناو ساعات طوال، وصلات فبعض الحالات حتى لـ7 ساعات باش يدخلو للمغرب.
هاد الاكتظاظ خلا بزاف ديال السيارات يباتو فالعراء ليلة كاملة وسط برد قارس، فمشهد رجّع معاناة العابرين لهاد المعبر للواجهة من جديد.
وحسب الإعلانات ديال سلطات سبتة، فالانتظار فالطابور كيدوز 5 ساعات، وزيد عليهم جوج ساعات ديال ختم الجوازات، بسبب بطء وثقل “السيستيم” ديال شرطة الحدود، اللي زاد عكّر الوضع.
وترجع أسباب هاد الاكتظاظ أساساً للأشغال اللي دايرة دابا فالجانب السبتي من المعبر، حيث خدامين غير بثلاث ممرات، الشي اللي كيطول ويعطل عملية العبور وكتوصل أحياناً حتى لـ10 ساعات.
وزاد على هاد الشي تزامن الوضع مع اقتراب عطلة نهاية السنة، وتوافد عدد كبير من سكان سبتة لمدن الشمال بحال الفنيدق، المضيق وتطوان، إضافة لمغاربة جايين من إسبانيا ودول أوروبية وباغيين يدوزو العطلة فالمغرب.
هاد الشي كامل جا فظروف مناخية قاصحة، البرد حتا هو زايد على العابرين، خصوصاً اللي باتو فالسيارات ديالهم.
فالمقابل، كيبان باللي العبور من الجانب المغربي دايز بسلاسة بلا عراقيل، وهاد الشي كيطرح علامات استفهام على تدبير الجانب الآخر للمعبر فهاد الظرفية.
