كود سبور//

على طريقة عدد من الشباب المغاربة وخصوصا المشرملين والمراهقين، شرا كول منتخب الأرجنتين المثير للجدل إيمليانو مارتينيز، كلب ديال الحراسة باش يحضي له الميدالية الذهبية اللي ربح فكأس العالم من بعدما توج مع منتخب بلادو باللقب وهو التتويج اللي جا على حساب فرنسا فالفينال.

وكشفت جريدة “ديلي ستار” البريطانية، أن كول الأرجنتيني وفريق استون فيلا الننكليزي إنفانتينو مارتينيز شرا كلب حراسة كيخلع، من نوع المالينوا البلجيكي، باش يحرس له الميدالية اللي حاط فدارو فالننكليز.

وحسب نفس المصدر، كيتعبر كلب المالينوا البلجيكي من أحسن كلاب اللحراسة، وماشي الأرجنتيني مارتينيز اللي تشهر بحركتو الشهيرة ملي تسلم جائزة أحسن كول فكأس العالم قطر 2022، ماشي هو أول مشهور كيربي مالينوا حيث بزاف من المشاهير ولاعبي كرة القدم كيربيوه باش يحرسهم، وكيخدمو به حتى العسكر ديال الميريكان وبالضبط قوات المارينز.

للإشارة فتربية الكلاب من نوع المالينوا انتشرت بشكل كبير فالمغرب.