كود – مراكش //

كتوجد مدينة مراكش فهاد الربيع باش تستقبل واحد الحدث فني سميتو “حلقة”، وغادي يكون ما بين 10 و18 أبريل 2026، هاد البرنامج اللي كتنظمو مؤسسة مونتريسو بالتعاون مع المعهد الفرنسي بمراكش ومؤسسة علي زاوا، كيجمع ما بين الرقص المعاصر، الثقافة الحضرية، والفنون البصرية فواحد التجربة فنية جديدة.

الفكرة من “حلقة” هي تحويل مراكش لفضاء مفتوح للإبداع، مني الحركة ديال الجسد كتولي وسيلة للتعبير والتواصل بين الفنانين والجمهور، ماشي غير عروض، ولكن حتى ورشات، إقامات فنية ونقاشات، يعني تجربة كاملة كتشجع على التفاعل وتقاسم الأفكار.

من بين المشاركين كاينة فرقة باليه بريلجوكاج اللي أسسها أنجيلين بريلجوكاج، واللي غادي تضيف قيمة كبيرة للبرنامج، خصوصاً من الأنشطة اللي كتستهدف الشباب ونقل التجربة الفنية بطريقة مباشرة.

البرنامج فيه حتى فقرات مميزة، بحال عرض فيلم “Danser pour grandir” اللي كيهضر على الرقص كوسيلة للنمو والتعبير، ومن بعدو نقاش مفتوح. و كاين عرض كيدمج بين الرقص وموسيقى كناوة، اللي كيخلق جو فني فريد وكيجمع بين تقاليد مختلفة. وفي الأخير، غادي يكون عرض ختامي من طرف فرقة بريلجوكاج جونيور، اللي كيبين طاقة وإبداع الجيل الجديد.