كود سبور//

صبح مصير رئيس الاتحاد الفرنسي لكرة القدم نويل لكوريت على المحك، والبقاء فمنصب الرئيس مهدد من بعد الخرجة الإعلامية الأحد الماضي، واللي زلق فيها وتهكم على أسطورة كرة القدم الفرنسية زين الدين زيدان.

وحسب وسائل الإعلام الفرنسية والتقارير ديالها فنويل لوكريت رئيس الاتحاد الفرنسي لكرة القدم وجه الدعوة لأعضاء المكتب التنفيذي للاتحاد من أجل عقد اجتماع طارئ يوم غد الأربعاء بمقر الاتحاد، وحسب المعلومات اللي متوفرة، فإما غيعلن نويل لوكريت على الاستقالة بخاطرو فهاد الاجتماع أو غيتم الإعلان على الإقالة ديالو.

نفس المصادر، أكدت أن تصريحات نويل لوكريت المهينة فحق أسطورة فرنسا زين الدين زيدان، هي اللي غتكون السبب الرئيس فالرحيل ديالو من منصب رئيس الاتحاد الفرنسي لكرة القدم، ولكن ماشي هي الأولى، حيث كاينين أسباب أخرى مخليا الأعضاء ديال مكتب الاتحاد غاضبين عليه بسببها، من بينها ملف الدولي الفرنسي كريم بنزيما وكيفاش تم إبعادو من كأس العالم، وملفات أخرى مرتبطة بالعنصرية واتهامات جنسية، بالإضافة  إلى أن عدد كبير منهم كان يرفض التجديد مع الناخب الحالي ديديي ديشان وكانوا باغيين زين الدين زيدان يدرب منتخب فرنسا فالمرحلة المقبلة.