سهام البارودي – كود//
من نهار ولات سفيرة عالمية للتعليم و المغنية الميريكانية ريهانا خدامة من نيتها باش تجمع الفلوس للمنظمة ديالها لي كاتكفل بتمدرس الدراري و البنات فالدول الفقيرة ! و لكن لي عجبني بزاف بزاف فالخدمة لي دايرة ريهانا هي كيفاش كاتخدم وسائل التواصل الاجتماعي باش تجمع الفلوس بطريقة مباشرة ! مؤخرا مثلا سيفطات ميساج فتويتر لإيمانيل ماكرون الرئيس الفرنسي و لرئيسة وزراء بريطانيا تيريزا ماي و لبزاف ديال رؤساء الدول و الشخصيات المعروفة و ماشي ميساج طويل و فيه الدخول و الخروج فالهضرة و التبحليس! لا ميساجات قصيرة واضحة و ديريكت نقدو نلخصوها فجملة ” واش فيك شي فلوس و لا والو ” ! و هاد الحملة غاديا على قدم و ساق و نجحات أنها تحرك بزاف ديال الدول الكبرى و تخليهم يعاونوها فالمهمة ديالها و تاهوما يعاونو “الفريق” ! باش يشجعو على التمدرس ديال الأطفال فالدول المقودة عليها…
هاد الخدمة لي دايرة ريهانا خلاتني نفكر علاش ماعمري ماشفت شي فنان مغربي من هادوك لي كايحلو علينا فمهم فالاذاعات و التلفزات خصوصا الفنانين المشهورين و لي مسك عليهم الله و عندهم شعبية كبيرة و جمهور طويل عريض من المحيط الى الخليج تاهوما اونگاجي فشي حملة فحال هادي لي دايرة ريهانا ! حملة جمع تبرعات لبناء مدارس و لا جمع تبرعات لشراء بيشكليطات لدراري فالدواور لي بعيدة عليهم المدرسة و لا اي حملة ( من غير دوك الحملات الرسمية لي كاديرهم الدولة و كاتعيط عليهم يبانو فيها ) !
علاش الفنان المغربي ماكانشوفوهش فالعمل الخيري لي على حقو و طريقو ؟
غاتقوليا ” أنا كاندير الخير بلا مانقول للناس راه كانديرو” غانقولك “حيد عليا من الطنز العكري” ! انك تشري حولي و لا جوج فالعيد الكبير لعائلة فقيرة و تصور داير سيلفي مع الحولي ماشي هوا العمل الخيري الحقيقي لي غاتكون منو الكاينة فالمستقبل ! حيت الحولي و لا السكر و الزيت غاياكلهم داك الفقير و غايخراهم ! لا بغيتي كفنان و لا انسان مشهور دير الخير ديال بصح هي نشوفك مستاغل الشهرة ديالك و الجماهير ديالك باش تجمع الفلوس لبناء مدرسة مثلا ! مركز للتكوين ! تيران فين يلعبو الدراري ! هنا فين كايبان الذكاء ديال الفنان و الاحساس ديال الفنان !
النجوم ديال برا غير كايديرو الفلوس كايفكرو يديرو فونداسيو للعمل الخيري ! “ايلطون جون” عندو منظمة ديالو كاتعنى بمحاربة داء السيدا و تشجيع البحث العلمي للقضاء على هاد المرض ! شاكيرا عندها تاهي منظمة ديالها للعمل الخيري الهدف ديالها هوا انقاذ الاطفال من الفقر و لي لحد الساعة ساهمات فتمدرس اكثر من ربعالاف طفل فكولومبيا و خدامة كاتبني المدارس و الخيريات لاستقبال المزيد من الاطفال ! ميسي ! مادونا ! انجيلينا جولي ! براد بيت! و بزاف ديال النجوم غير بانو و تشهرو و ولا عندهم نفوذ فالعالم فكرو يستاغلو هادشي فالعمل الخيري ! و راهم غادين فيه ! و كايساهمو بشكل كبير فانقاذ بزاف ديال الناس لي مقودة عليهم فدول مقودة عليها ! كايديرو هادشي باش يبانو زوينين ! كايديرو هادشي باش يلمعو الصورة ديالهم ! ماسوقناش ! المهم أنه واحد الدري فقير مزلوط فرواندا كان ماعمرو يحلم يدخل للمدرسة اليوم بفضل ريهانا غاتبنا حداه ديك المدرسة و غايقدر يمشي ليها و يقرا فيها و شكون عرف يقدر ينجح و يمشي بعيد و يعاون راسو و يولي فرد صالح فالمجتمع من بعد.
علاش الفنانة ديالنا ماعندهمش هاد الفكر ؟
غاتقوليا و لا حگا ميريكان هاديك ! مادونا هاديك ! ريهانا هاديك ! غانقوليك تاحنا ماطالبينش هاد الفنان المغربي يجمع ثمنميات بليون دولار فحال ريهانا ! و عارفين بلي كولا و جهدو و المغرب هادا ! و لكن لا عاوتاني، تاحنا عندنا نجوم عندهم جمهور كبير و عندهم نفوذ و كايعرفو شخصيات كبيرة فالعالم العربي على الاقل و لا ماعندهمش نجومية ريهانا راه عندهم نجومية و شعبية لا يستهان بها عند العرب، و لا فكرو يدخلو لهادشي ديال العمل الخيري راه غاتكون نتيجة مزيانة بزاف.
راه خاص مأسسة ديال العمل الخيري و يكون عمل خيري عندو بعد استراتيجي و اهداف على المدى المتوسط و البعيد و يعود بالنفع على الفرد و المجتمع ( الحولي ديال العيد الكبير و الحوايج ديال العيد الصغير هادوك غي نساوهم ! راه كايغرقو دوك الفوقارا اكثر ماكايعاونوهم) ! لا بغيتو ديرو خير نيت ! بنيو لداك الفقير فين يقرا و عاونوه يشري الكتوبة و يتعلم اللغات باش يتعلم و يخدم و يشري لراسو داك الحولي د العيد واحد النهار.
و نتا كفنان ! قبل ماتبدا تبكي و تشكي علاش ماكايجيبوكش لموازين و علاش فاش كايعيطو ليك كايخلصوك اقل من الفنان الأجنبي، فكر بعدا بعقلية الفنان الأجنبي و دير داكشي لي كايدير الفنان الأجنبي و كون داير الخير لي داير داك الفنان الأجنبي … عاد حل دليقيشك!
