وكالات//

خسرات ريهانا، النجمة العالمية، مبلغ كبير كيوصل لـ36 مليون دولار من بعدما ما نجحاتش ماركتها الفخمة ديال الحوايج”Fenty” ، اللي كانت بداتها فـ2019 مع شركة LVMH اللي كتمتلك الماركة المعروفة “Louis Vuitton”  المشروع تسد فـ2021 حيت ما جابش النتائج اللي كانو كيتسناوها، وهادشي جا حتى من تأثيرات كورونا.

وحسب جريدة “ديلي ميل” البريطانية، ريهانا استثمرات تقريباً 34 مليون دولار من خلال شركتها فبريطانيا “Denim UK Holdings”، وكانت كتملك تقريباً النص بنسبة 49.99%، وLVMH حتى هي ضخت نفس المبلغ. ولكن، بسبب القيود ديال السفر، ماقدراتش ريهانا تسافر لباريس ولا تزور المصانع فإيطاليا، وهادشي خلاها مبعدة على التصميم، وهي معروفة أنها كتدخل فكلشي التفاصيل.

الماركة  “Fenty”، اللي اسمها على اسم عائلة ريهانا، كانت بغات توسع الإمبراطورية ديالها اللي فيها أصلاً ماركات ديال المكياج واللانجري، وتدخل مجال الحوايج الفخمة، صباط، و… ولكن، الأسعار اللي كانت زايدة بزاف خلات الناس مايتجاوبوش معاها، بحال سطرة (جاكيت) ديال الجينز اللي كانت كتتباع بـ1000 دولار. عكس الماركات الأخرى ديالها “Fenty Beauty” و”Savage X Fenty”  اللي أسعارهم معقولة وكيتقاداو منها بزاف دالناس.

فـ2021، ريهانا وLVMH  قررو يسدو خط الأزياء ويركزو على تطوير الماركات اللي خدامة مزيان فالمكياج والحوايج الداخلية. وقالو فواحد البلاغ: “ريهانا وLVMH  كيبينو التزامهم بتطوير منظومة Fenty على المدى البعيد”.

ورغم هاد الخسارة، ريهانا باقي وحدة من أنجح الفنانات فمجال البزنس، بحيث فـ2022 خذات لقب أصغر مليارديرة عصامية فـأمريكا، بثروة ديال 1.4 مليار دولار.