كود – عثمان الشرقي//

فالندوة لي دار لبارح قال الفنان العالمي «نادر بلخياط» المعروف بـ“ريدوان”، إن اختيار الفنانين اللي شاركوا فأغاني كأس إفريقيا كان فوقت قصير ومزير وما كانش عندو الوقت الكافي باش يحضّر المشروع بشكل عادي وهاد الضغط خلاه يتواصل مع الفنانين اللي عندو معاهم علاقات صداقة ومعرْفة باش يقدرو يوجدو العمل فالوقت المحدد.

كيذكر ريدوان أن الاختيارات كانت مبنية على الثقة فقدرات الفنانين، وكلهم قبلو المشاركة بلا نقاش على الأجور أو العقود، حيت المشروع عندو طابع وطني، وكيطمح يشتغل مستقبلا مع أسماء أخرى ويعطي فرصة للشباب المغربي.

بالنسبة للانتقادات على مشاركة الفنان المصري محمد رمضان، قال ريدوان إن الناس تسرعوا فإصدار الأحكام، وأنه تعرض لهجوم حاد بسبب تداول فيديوهات تصوير رمضان لكليب بالمغرب وزاد: “فضلت أن الأغاني اللي غتخرج هي اللي تجاوب على هاد الانتقادات”.

بالنسبة للخلاف مع أمينوكس، شرح ريدوان أن أمينوكس سجل الأغنية ولكن ما قدرش يصور الكليب حيت كاين برا المغرب، وهذا اللي خلاه يعيط على مهدي موزيين، عوض أمينوكس لي اقترح تصوير الأغنية بالذكاء الاصطناعي، وهادشي خلا جوج ديال النسخ  من الأغنية، ورد أن  مهدي موزيين عجبو صوتو وأن الألبوم خدمو بالنية والروح الوطنية وخا الوقت مكاينش.

ريدوان شدد أن انسحاب بعض الفنانين قرارات شخصية وما عندوش علاقة بها، وأنه ما تخوفش من إنتاج بزاف أغاني للكان باش يرضي كل الأذواق ويشارك أكبر عدد من الفنانين وختم أن حضورو اقتصر فقط على الأغنية اللي شارك فيها فرنش مونتانا، مع الإشادة بالتنظيم الجيد للحفل.